Түркия мен Ресейді татуластырған – Қазақстан
Анкара қаласында Халықаралық «Эко-Еуразия» экономикалық қатынастар қауымдастығының ұйымдастыруымен «Астанадан Женеваға: Сирия бейбіт келіссөзі» атты халықаралық ғылыми-практикалық конференция өтті.
Жиынға Қазақстанның Түркиядағы елшілігінің уақытша сенімді өкілі Ә.Есенгелдиев, «Эко-Еуразия» қауымдастығының төрағасы Хикмет Ерен, Йылдырым Баязит университетінің профессоры Салих Йылмаз, Халықаралық қатынастар және стратегиялық сараптама орталығының сарапшысы Жан Үнвер, Түркияның белгілі саясаттанушы ғалымдары мен БАҚ өкілдері қатысты.
Конференцияда құттықтау сөз сөйлеген Қазақстанның Түркиядағы елшілігінің уақытша сенімді өкілі Әлімхан Есенгелдиев ҚР Президенті Н.Назарбаевтың халыққа жолдаған арнайы Үндеуі туралы мәлімет беріп, «Қазақстанның үшінші жаңғыруы: Жаһандық бәсекеге қабілеттілік» атты Жолдаудың негізгі басымдықтарын атап өтті.
Сондай-ақ Сирия мәселелерін реттеу жөнінде Астанада өткен келіссөздерге қатысты Қазақстанның БҰҰ Қауіпсіздік кеңесінің тұрақты емес мүшесі ретінде Таяу Шығыс өңіріндегі қауіпсіздік пен тұрақтылықтың орнап, беки түсуіне мүдделілік танытатындығын жеткізіп, конференция қатысушыларына алғыс айтты.
«Эко-Еуразия» қауымдастығының төрағасы Х.Ерен өз сөзінде Астананың әлемдік бейбітшіліктің орталығы мен нышанына айналғанын, Сирия мәселесін реттеуге қатысты кепілдік берген Түркия, Ресей және Иран мемлекеттері қатарында Қазақстанның қосқан үлесінің зор екенін атап өтті.
– Осы тұста Қазақстанның Президенті Н.Назарбаев аз үлес қосқан жоқ. Сондықтан да Сирия ахуалын шешуді көздейтін келіссөздердің Астанада өтуі тосыннан емес. 2015 жылы Астанада жекелеген сириялық оппозиялық топтар арасындағы келіссөздердің 2 кезеңі өткен болатын. Қазақстан тарапы сириялық босқындардың бейнетін жеңілдету үшін 700 мың доллардан астам қаржы бөлді, таяуда азық-түлік түріндегі 500 тонна гуманитарлық жүк жөнелтті. Астанада өткен келіссөздер барлық мүдделі тараптардың БҰҰ қамқорлығындағы женевалық үдеріс аясында сириялық дағдарысты оңтайлы шешуді қамтамасыз етті және Сириядағы бейбітшілік пен тұрақтылықты орнату ісіне лайықты үлесін қосты деп сенімді түрде айтуға болады, – деді Х.Ерен.
Жиынның бас баяндамашысы Йылдырым Баязит университетінің профессоры С.Йылмаз 2017 жылдың 23-24 қаңтары аралығында Астанада өткен келіссөздердің оңды нәтижеге қол жеткізгендігін айтты.
– Астана келіссөзі аяқталғаннан кейін жасалған мәлімдеме бойынша тараптар БҰҰ Қауіпсіздік кеңесінің қабылдаған шешіміне назар аударды. Бұдан кейінгі келіссөздер осы шешімнің негізінде жалғасатын болады. Әрине, бұл жағдай саяси реттеуге жол ашатындығы мәлім. Бұдан бұрын Сирияда оқ атпау туралы уағдаластыққа келіп, саяси тұрғыдан ретке келтіру үшін таласқа түскен тараптар шақырылған болатын. Бұл үдерісті БҰҰ бақылайтындығын жеткізді. Осы тұрғыдан келгенде, Астана үдерісі өз міндетін толық орындады. Не себептен Астана? Неліктен басқа батыстық мемлекет емес? Өйткені Батыстың кез келген елі өз тұрғысынан таразылайтындығы мәлім, ал Астана – Батыс пен Шығыс аймағының кіндігі. Екіншіден, Қазақстан саяси-экономикалық саласын ұдайы жаңартып, көпвекторлы бағдар ұстанып келеді. Бұған Қазақстанның Президенті Н.Назарбаевтың биылғы жылы халыққа арнаған Жолдауы куә. Үшіншіден, Түркия мен Ресейді татуластырған бірден-бір мемлекет Қазақстан екені белгілі, – деп баяндады.
Халықаралық қатынастар және стратегиялық сараптама орталығының сарапшысы Ж.Үнвер Қазақстанның ұстанған сыртқы саясатының бейбітшілікке негізделгендігін тілге тиік етіп, Астана үдерісінің қазақ дипломатиясының жетістігі екендігін айтты.
YENİ HABERLER
YORUMLAR
Henüz hiç yorum yapılmamış.
